獅吼Hea踢 益晒墨爾本勝利

猪拉多纳

季尾揀波戰意最緊要

每逢季尾揀波要睇爭標同護級形勢，澳職冇降班制度，就要吼實季後賽資格呢瓣。上屆總冠軍布里斯班獅吼為趕上季後賽尾班車，最近發憤圖強連贏兩場，但由於珀斯光輝因為超越工資帽上限，被罰26.9萬澳元兼褫奪季後賽資格，令佢哋穩奪季後賽入場券，今日主場迎戰決心爭做常規賽盟主嘅墨爾本勝利，隨時留力等踢季後賽，受讓平半都制唔過，撐勝利2.02倍上盤啱數。

（開賽時間：周三下午5:40）
喪攻3子夠弗 勝利爭常規賽冠軍

獅吼喺聯賽榜排第7名，原本要壓過墨爾本城至有得踢季後賽，但隨住珀斯光輝被澳洲足總判罰今季結束後跌落第7，變相褫奪季後賽資格，加上中岸水手就算贏晒最後兩場聯賽排名都過唔到獅吼，令獅吼最後幾場無論踢成點都攞硬最後1張季後賽入場券，爭勝決心大打折扣。再講，獅吼除咗後衞丹尼爾保尼斯坐波監，守將普蘭斯、史提芬魯圖、諾夫同門將迪奧列托斯都唔踢得，成條防線天殘地缺，點信得過先？

墨爾本勝利上輪主場鬥包艇嘅紐卡素噴射機，全場撳住嚟砌，最終倒灶輸波，將帥谷到成肚火，今場實踢爭氣波。更何況珀斯光輝雖然「退出」爭標行列，仲有FC悉尼、阿德萊德聯同威靈頓鳳凰來勢洶洶，墨爾本勝利想要繼09年後再登常規賽盟主寶座，根本冇失分空間，好在「喪攻3子」古希美、艾奇湯臣同貝利沙呢班進攻好手狀態幾弗，近5場聯手貢獻8球，要幫勝利再響勝鼓唔難啫。