鹿角作客玩大佢

猪拉多纳

柏雷素爾唔使讓波有景轟

日職兩支亞冠盃代表柏雷素爾同鹿島鹿角提早喺星期四出場，柏軍主場鬥鹿角，呢場做緊平手盤，個盤真係鬼到爆，有乜理由鹿角作客未開齋兼往績輸晒都開平手盤，仲要係鹿角低水喎。蘇豪怕鬼唔玩盤喇，柏軍防線勁曳，已經連開五口大，一於追多鋪大盤啦！

（有線61及201台周四晚6時直播）

你信我啦，真係有鬼呀，今場個盤勁奇怪！鹿角聯賽連亞冠盃作客四戰一和三負，近五次造訪柏雷素爾兩和三負，睇績完全唔對路。隊中王牌前鋒達維長抖，前線要用高崎寬之呢類普通貨色擔大旗，中場老牌球星小笠原滿男又傷埋。喂！唔掂喎！鹿角績又輸，人腳又唔齊，莊家仲開個平手盤，唔通真係開倉派米？想買柏雷素爾嘅朋友小心中伏呀！

柏雷素爾又係靠唔住，佢哋個巴西主帥尼仙奴跳槽教神戶勝利船，會方求求其其搵個青年軍吉田達磨頂檔就算，佢之前都未帶過日職球隊，依家真係邊做邊學，今季班波仲要兼顧埋亞冠盃，梗係惡搞啦！柏軍近期最大問題係後防唔掂，對上五場波失十一球，前仗亞冠盃作客FC山東同對手踢成4比4，入埋都唔夠失，點搞呀！
近四次交手三場開大

不過，柏雷素爾前線進攻鐵三角李安度蒙迪拉、工藤壯人、基斯坦奴達施華係有卡士，而鹿島鹿角新兵金崎夢生季初腳風都好順，現時喺聯賽已有三球進帳，佢之前去過葡萄牙踢樸迪莫倫斯，浸過鹹水係叻咗嘅。兩隊近四次交手三場開大，呢次簡簡單單玩大啦！