禾堡大起拿玻里

猪拉多纳

歐霸半準決賽首回合重頭戲德甲禾夫斯堡主場迎戰意甲拿玻里，兩軍都對冠軍充滿野心，禾夫斯堡一早已被捧成奪標大熱門，不過拿玻里全城對盃賽專家教頭賓尼迪斯充滿信心，呢場甚有冠軍前哨戰味道，賓尼迪斯深明兩回合淘汰賽作客入球重要性，今仗志在攞作客入球賀佢自己55歲大壽，唔會龜縮，但佢哋後防甚曳，好難頂得住火力全開嘅禾堡轟炸，Alwin建議雙選入球大同禾夫斯堡上盤。

（有線61及201台周五凌晨3時05分開賽）

禾夫斯堡喺德甲位列次席，只因榜首拜仁慕尼黑實在太強，堪稱「外星球隊」，不過禾堡喺體育總監K阿羅夫斯同教練赫基合作下，已經將分內工作做到最好，打入歐霸8強，德國盃4強，聯賽次循環曾經大勝拜仁，單計次循環得分甚至比拜仁更多，球隊前線得分點多，而且一眾攻擊球員已經攞到極佳默契，肯為球隊無私付出，包括近期自知腳風唔順嘅首席射手巴斯杜斯，上場聯賽對漢堡甘願充當綠葉，不斷奔跑為隊友製造機會，雖然冇入波，但交出兩個助攻成為最佳球員，配合狀態大勇嘅奇雲迪布尼同卡利古尼，仲有舒賀爾尼同麥斯美艾洛特幫助，火力極強，上一圈兩回合合計以5比2輕取另一意甲球隊國際米蘭，今仗主場出擊當然有信心盡情搶攻。
肥賓55歲大壽恐敗興

拿玻里上次揚威歐洲賽已係1989年捧得歐洲足協盃，當時球隊擁有阿根廷球王馬納當拿，嚟到今年佢哋終於再有希望，除咗擁有另一阿根廷球星希古恩外，仲有曾經帶領華倫西亞、利物浦同車路士捧得歐洲賽冠軍嘅賓尼迪斯領軍，呢位盃賽專家今日啱啱55歲大壽，全隊球員都希望攞到好成績賀佢，不過佢哋整體實力唔夠禾夫斯堡平均，尤其防線實力一般，同禾堡搶攻難保不失。