鳳凰收晒火吼入球細

猪拉多纳

今日有兩場澳職賽事直播，科娜一於同大家講晒兩場波。先開波嘅係威靈頓鳳凰主場對中岸水手，鳳凰呢支新西蘭球隊近況麻麻，連續三場失分之餘，更係三場都冇波入，咁搞法真係捧唔落手啵，不如改捧入球細啦！

(有線64及203台周五下午3時30分直播)

澳職剩番兩輪比賽，威靈頓鳳凰已經順利取得季後賽資格，成績算係唔錯，不過呢隊波近三場錄得兩負一和，輸嗰兩場都喺主場，雖然對手係聯賽頭兩位嘅墨爾本勝利同FC悉尼，但都唔使兩場都輸三粒兼零入球咁肉酸啩？啱啱嗰場作客實力較弱嘅墨爾本城，勢估唔到鳳凰神射手尼敦般斯射失12碼，最終悶和0比0完場。雖然話今仗對住嘅中岸水手本季作客表現唔掂，不過水手作客鳳凰嘅往績就唔曳喎，近四次作客鳳凰取得一勝三和，四場全部開細盤，今場入球細穩開呀！
FC悉尼半場拆散噴射機

另一場由澳職「阿二」FC悉尼作客紐卡素噴射機，FC悉尼爭做常規賽冠軍仍未絕望，今場肯定搏晒命，而且又有入咗7個聯賽入球嘅史美斯刑滿復出，中場泰華利斯亦有望傷愈上陣，主場三連敗嘅噴射機肯定冇運行，要頂到半場都有難度，一於捧FC悉尼半場客勝！

（有線64及203台周五下午5時45分直播）