紅魔好火閃爆車

猪拉多纳

兩強對撼 鑽石中場互晒行頭

今晚英超爆發重量級大戰，由榜首車路士坐鎮主場硬撼3哥曼聯，雙方皆擁有一條粒粒皆星嘅鑽石中場。不過，紅魔喺主帥尹戈爾悉心打磨後，由桑馬達、費蘭尼、艾舒利楊格及安達靴里拉組成嘅中場組合，「火」數十足堅「燦眼」，遇着近期跌緊Watt嘅「藍戰士」，表現閃亮嘅紅魔有力反客為主，有得受讓實在好筍，捧讓球客勝。

（now 621周日凌晨零時30分直播）
廢柴同盟擦出火花

曼聯自上月足總盃不敵阿仙奴後，立即喺聯賽連贏熱刺、利物浦及維拉同曼城，目前穩坐第3，依家佢哋打多1場下落後榜首車仔8分，尚餘6輪下要超車奪冠係就難啲，但並非冇可能，因此紅魔唔會輕言放棄。近日紅魔名宿史高斯一針見血，話迪馬利亞喺輸畀阿仙奴之役領紅牌被逐，成為球隊反彈嘅轉捩點。正正喺呢位阿根廷貴價翼鋒坐波監期間，領隊尹戈爾索性變陣4141，將桑馬達、費蘭尼、艾舒利楊格、安達靴里拉放喺箭頭朗尼後面，呢4位一度被噓爆嘅「廢柴同盟」，意外地產生化學作用。桑馬達同艾舒利楊格可邊可從側翼內切攻堅，安達靴里拉則能攻善守，費蘭尼為中前場增添硬朗元素，適當時機入楔嚟一招高空轟炸，令對方防不勝防。單計近4場勝仗嘅12個入波中，「廢柴同盟」合力包辦咗8球，立即翻身升呢成為鑽石級中場。
車路士跌Watt讓唔起

車仔方面，由尼曼查馬迪、法比加斯、奧斯卡杜斯山度士及夏薩特組成嘅中場，一樣係鑽石級，尤其係後三者季初經常以穿花蝴蝶般嘅組織攻勢，令車仔贏波又好睇。可惜，踏入季中法比仔立晒油令車仔跌Watt，歐聯16強兩回合打和法甲班霸巴黎聖日耳門黯然出局後，成隊波好似冇晒方向。最近3場聯賽都贏得勁辛苦，今仗更有兩位前鋒迪亞高哥斯達及雷米因傷缺陣，要靠老將杜奧巴掛帥，雖然陣前傳出曼聯有卡域克、戴利白蘭特、菲爾鍾斯同馬高斯盧祖4件傷兵，但尹戈爾只要將費蘭尼縮後打防中，出番迪馬利亞，前線仍由朗尼任單箭頭，以紅魔當前氣勢，對車仔而言仍然好惡啃，讓波之下梗係捧對家。

值得一提係，兩軍近年交手經常踢到飛沙劈石，連埋盃賽之前8次正面交鋒，共製造咗5張紅牌，車仔球員就佔咗3張，是但一方領紅都會令整場波嘅形勢唔同晒，玩即場投X嘅球迷，記住要留意戰情發展買波嘞！
桑馬達倒戈 數據K.O.奧斯卡

今晚「車曼戰」，係弗爆紅魔中場桑馬達首度重返史丹福橋球場倒戈。車仔主帥莫連奴上季回巢執教，季中無喇喇將之前兩季表現出色嘅桑馬達賣畀曼聯，認為佢雖然進攻力強，但防守上卻唔夠奧斯卡杜斯山度士咁有效率。

不過，近日有外國網站就將兩人做咗個比較，發現桑馬達無論喺成功傳送、致命傳送、射門準繩度、成功盤扭及被侵犯次數，瓣瓣都勝過奧斯卡。而且佢今季各項賽事共交出14入球8助攻，亦完勝呢位車仔舊隊友嘅8入球7助攻，因此桑馬達今仗實會踢爭氣波，證明車仔放棄佢係錯誤決定，剝莫帥棚牙。