伊巴謙闖魯營 大戰巴塞MSN

猪拉多纳

巴塞隆拿今晚主場迎戰巴黎聖日耳門呢場歐聯8強次回合，隨住巴塞喺首回合作客都贏3:1，競爭性已經大大減低。不過，「巨星之戰」仍然係綽頭，尤其PSG王牌前鋒伊巴謙莫域呢場波監刑滿，將重返魯營，為公為私，呢位巨星肯定會施展渾身解數爭取奇迹。咁啱巴塞嘅「MSN」黃金三叉戟一向剋死PSG，雙方一眾進攻天才喺冇包袱之下，可望大展身手，中位數3.5球，2.1倍入球大包無走雞！

（有線61及201、中央5台周三凌晨2:45直播）

美斯、尼馬同蘇亞雷斯夾咗大半季，已經充滿默契。睇番紀錄，原來巴塞今季歐聯3次對PSG，夾埋入咗成8球，咁啱呢8個入球都係由佢3個包辦！尼馬同蘇亞雷斯分別入3粒，美斯亦有2球，由此可見，聖日耳門根本守唔掂佢哋，今場睇怕又係「MSN」嘅數胡時間！何況主帥安歷基賽前講到明，今場波唔要打和要贏波，佢3個實去盡啦，入球大細中位數去到3.5球都唔怕！
MSN包辦對PSG所入8球

其實聖日耳門進攻火力一啲都唔輸蝕，伊巴謙莫域今場復出掛帥，更加係鋒力大增。記得佢當年同巴塞係不歡而散嘅，所以每次倒戈，都踢得特別落力。之前分組賽作客魯營嗰陣，「伊巴謙」已經入過波，依家PSG出線機會危危乎之下，佢就更加想再「安哥」，救得幾多得幾多啦！
PSG至少要贏3粒

形勢上，聖日耳門呢場可以話係焗攻。巴塞依家有3個作客入球喺手，今場「最低消費」要贏3:0先至可以出線。之但係要巴塞喺主場唔入波簡直難過登天，求人不如求己，PSG要創造奇迹，不如自己入多幾球好過，卡雲尼同拿維斯都係「伊巴謙」嘅好幫手。既然「波係圓嘅」，有咁多支大炮喺手，聖日耳門無理由唔搏埋佢o架！
頂占筍盤：巴塞隆拿（入球大）