廣州1分夠出線首爾受讓博得過

猪拉多纳

1分都夠出線！呢種心態對廣州恒大淘寶（足智彩譯FC廣州）今日响亞冠盃H組作客FC首爾，可能產生不利影响，恒大客場仲要讓對手平半好唔着數，都係博吓個半場和或者下盤比較保險。

（now671台周二晚6:30直播）
場地太爛半和抵玩

目前恒大响H組9分帶頭，同西悉尼流浪者同得5分排第2嘅FC首爾，有成4分差距，依家只剩兩輪波，恒大今場執1分都提前出線，相反首爾攞唔足3分嘅話，隨時畀西悉尼甚至包尾嘅鹿島鹿角過頭，所以形勢係首爾唔贏唔得，恒大和都搞掂，兩隊嘅心態差異，決定咗場波唔可能由一開始就對攻，恒大一定會玩穩守突擊，2.05倍半和真係有權開出。

事實上今日亦唔輪到恒大唔守住先，因為首爾個場地近排好曳，好多地方成舊草頭凸晒出嚟，前日到咗首爾適應環境嘅恒大，只係尋日練一課就算，既想畀球員抖吓，亦都為減少受傷機會，於是乎今日開波嘅初段，恒大班人仲係處於適應狀態，又點會同你亂咁攻呀？

相反有地利嘅首爾就唔同喇，因為車斗里養傷兼形勢需要，佢哋今日會派摩連拿、鄭祖國同今季腳風好順嘅金賢聖打三箭頭，實行強攻恒大博W。不過，恒大近期幾件傷兵都復原得幾好，例如龍門曾誠已經响中超復出咗成個星期，對防線穩定性大有幫助，真係冇必要同首爾博拳咁笨，呢啲環境就算嫌熱唔玩首爾受讓平半個1.75倍下盤，都不妨試吓個半和。