前進去盡！山東敲半場大

猪拉多纳

山東魯能（足智彩譯FC山東）今日响亞冠盃E組如果炒唔到來訪嘅越南「一哥」平陽，就連理論上嘅出線機會都冇埋，但呢班波入得又失得，傷兵又多，寧博佢半場開入球大。

（now671台周三晚7:00直播）

山東呢支中超強隊簡直係超級海鮮波，季前贏到恒大捧走中國超級盃，近期居然可以3戰不勝，期間失咗11球，上場亞冠主場對住柏雷素爾，幾次領先最終都只打和4:4，將自己逼上絕路，真係令人估唔到。
唔炒平陽即瓜得

目前E組柏雷素爾、全北汽車同時8分Lead住，山東得4分排第3，佢哋今日贏唔到包尾嘅平陽固然瓜得，就算炒起對手，都要睇柏雷對全北嘅戰果，最理想梗係呢兩隊打和，然後山東就可以博喺壓軸戰作客砌低全北，咁就有望次名出線，難度非常大。

難還難，山東今場唔搏唔得，事關佢哋近排戰績低落，已惹起擁躉不滿，假如連平陽都搞唔掂，出唔到線仲係其次，到時根本冇法子收科，班球迷真係唔知會做啲乜嘢出嚟。因為冇得縮，山東今場波嘅宣傳海報，都用「前進，永不停止」做標題，表明一定去盡。雖然山東上場聯賽硬碰富力嗰陣，連傷禾達蒙迪路、汪強、張馳3員大將，其中蒙迪路斷鎖骨要抖成兩個月，汪強亦爆咗鼻骨，今晚冇可能出得，但山東仲有蒿俊閔、楊旭呢啲高質攻擊球員，半場攻破平陽大門唔難，只係考慮到山東防守比較牙煙，上半場入到兩、三球，下半場一樣失得，博讓2球嘅「讓主」有啲危險，都係玩1.88倍半場大算嘞。