歐霸8強次回合 地頭龍辛尼特發「維」

猪拉多纳

歐聯過後又輪到歐霸，今晚8強好戲一定係辛尼特主場恭候西維爾。暫時落後1:2嘅辛尼特，今晚有包括侯克在內嘅4大救兵「放監」，加埋回師惡爆主場，小讓西維爾平半，梗係要捧上盤啦！

（有線64及203、廣東體育周五凌晨3:05直播）

俄超「一哥」辛尼特首回合輸1:2，攞到個作客入球算係有交代，事關前鋒侯克、中場丹尼艾維斯、守將基斯薛圖同施莫尼哥夫都喺首戰停賽，今晚齊齊刑滿實唔係人咁品，就算輪到懷辛斯夫同加雷坐波監，相信主帥保亞斯都唔理得咁多，肯定落「柯打」畀侯克同荷西朗頓瘋狂轟炸西維爾大門。
西維爾首回合冇優勢

計埋歐聯，辛尼特近3場歐戰主場贏晒兼冇失波，當中包括大炒燕豪芬3蛋嘅佳績，保亞斯賽前呼籲球迷盡量嚟撐場，坐爆主場嚇窒對手，大佬叫到，班Fans唔係唔聽呀？衞冕嘅西維爾有守將丹尼爾卡列高大腿受傷缺陣，首回合主場對殘陣嘅辛尼特已經唔係有優勢，今鋪造訪自08年歐霸盃主場至今不敗嘅辛尼特，睇怕好難有運行。