哥帥 肥安因時制宜顯功力

猪拉多纳

啱啱喺周中4場歐聯8強次回合，雖然要捱夜睇波，但依然睇得如癡如醉兼獲益良多。首先巴塞技高一籌擊敗聖日耳門，拜仁首回合雖以1比3輸畀波圖，但主帥哥迪奧拿趁住對方兩名正選左右後衞停賽嘅弱點，放棄一貫Tiki Taka踢法，多用兩翼側擊，幾個入波都係頭槌建功，以雷霆萬鈞之勢大勝晉級，證明哥帥懂得因時制宜。
千祈咪睇小祖記

至於馬德里同城打吡安察洛堤亦顯功力，儘管皇馬之前7次對馬體會未贏過，不過主帥安察洛堤於賓施馬同加里夫巴利缺陣下，棄主攻轉踢穩守突擊反而得逞，其實馬體會主帥施蒙尼亦值得一讚，既唔會因球員受豪門垂青而阻人發達，又擅於用說話鼓動士氣，令球員全心全力為佢賣命，一場波嘅成敗不足以論英雄。最後係不被看好嘅意甲一哥祖雲達斯，若果陣中法國全能中場保羅普巴傷愈復出，絕對唔可以睇小，現時其奪標賠率有9倍可小敲。講番今晚英超，近況欠佳嘅紐卡素主場迎戰史雲斯，「喜鵲」仍要為護級搶分，憑住鬥志、地利及粉絲吶喊助威，相信佢哋可以贏番場。
金句

做教練想學法，就要捱夜睇歐聯