維拉革命 城功在望

猪拉多纳

遇強愈強！無懼高牆

英超衞冕冠軍曼城原本同車路士咬得勁緊，但自從踏入2015年後，「藍月亮」成班波走晒樣，家陣仲被阿仙奴同曼聯爬過頭，跌到落聯賽榜第4位添，曼城今晚迎戰殺入英總決賽嘅阿士東維拉，真係未必贏到，事關維拉遇強愈強，上星期仲殺入英總決賽士氣爆燈，箭頭賓迪基又入波入到唔曉停，莫講話拎1分，就算贏埋都仲得，維拉受讓，扒冷敲3.95倍「讓客」啦！

曼城上輪英超以2:0擊敗韋斯咸，大衞施華被「錘仔幫」中場高耶迪手肘批中塊面，即時要戴氧氣罩用擔架抬離場，其後更盛傳佢顴骨骨折添。好在曼城官方最近證實大衞施華傷勢並無大礙，只係虛驚一場，今晚可以繼續落場搏殺，都真係幾硬淨。
曼城連環倒灶洩晒氣

講真，曼城要成功衞冕英超冠軍已經冇可能，家陣唯一可以做嘅，就係谷阿根廷鋒霸阿古路拎金靴喇！只可惜由開咧至今斬獲20粒英超入波嘅阿古路，依家狀態真係麻麻地，幫佢造波嘅耶耶托尼、拿斯尼嘅表現又勁飄忽，根本靠唔住，上仗如果唔係有運，分分鐘贏唔到韋斯咸啦！始終曼城連環倒灶、歐聯出局後，成班波都冇晒鬥心，叫佢哋搏命真係好困難囉。

相反，阿士東維拉啱啱喺英格蘭足總盃淘汰利物浦殺入決賽，下月底會同衞冕嘅阿仙奴爭冠軍，士氣爆晒燈！睇番維拉對利物浦場波，無論組織攻勢定控制比賽節奏，維拉明顯遇強愈強，落後反而冇亂，仲可以一人走多步反勝「紅軍」，防線硬淨之餘鬥心又抵讚，搞到利記想攻都有心無力！
基仔食水煙舒活照撐

要數維拉陣中最令人驚喜嘅球星，除咗近4戰省6粒嘅賓迪基，就梗係輪到上仗交靚絕助攻嘅基亞利殊啦！人紅自然是非多，雖然「基仔」被人偷影到食水煙，好在維拉領隊舒活唔介意，仲力撐「基仔」，話呢啲只係小小嘅紀律問題，今晚點都唔會雪佢，等佢繼續正選披甲搏殺，家陣「雞蛋」維拉個勢咁勁，係時候做嘢，推冧「高牆」啦！
盤路解碼

兩軍近10次對賽開7口「入球單」。
Data King：曼城主場旺開半大

‧曼城近5戰主場有4次開「半場大」。

‧維拉前鋒賓迪基連續4戰有入波。

‧維拉近4場英超客勝開晒「客客」。