愛斯賓奴踢得兇狠 巴塞錫身打吡獻細

猪拉多纳

「加泰羅尼亞打吡」今晚西甲爆發！「一哥」巴塞隆拿會造訪同市嘅愛斯賓奴，加泰羅尼亞打吡一向火藥味濃，皆因巴塞技高一籌，愛斯賓奴球員粗野攔截少不免。加上巴塞有布斯基斯同蘇亞雷斯等好戲之人，自然火上加油，肯定打甩髀！既然愛斯賓奴近況唔錯，對住賽程密麻麻嘅巴塞應該有力抗衡，隨時變成拉鋸戰，中位數3.5球一於力撐1.62倍入球細。

（now632台周六晚10:00直播）

愛斯賓奴近6場聯賽不敗，錄得2勝4和，當中主場和過馬德里體育會，狀態相當唔錯。任職前鋒嘅隊長沙治奧加西亞近4場有2個士哥，可惜今仗對手係「地上最強」，以守為主之下供應唔慌多，要入波難啲囉！況且愛斯賓奴近年主場對巴塞踢得特別硬朗，失波都係一球起、兩球止，少有大敗。
「賓佬」6戰不敗交手失波少

巴塞周中歐聯8強次回合贏波進身4強，梅開二度嘅尼馬話隊波狀態極佳，有力問鼎「三冠王」。「MSN」組合輪流發威，成為佢哋近期錄得12勝1和嘅主因，不過唔好忘記巴塞征戰頻密，所以攞到領先優勢嗰陣，好多時會控球在腳，保持勝果到尾，特別係作客比賽更為明顯。

今仗恩尼斯達養傷避戰，換上控制比賽節奏最耍家嘅沙維，假如畀佢哋領先仲唔搓到你暈？而且面對愛斯賓奴嘅硬朗攔截，相信美斯、尼馬等球星都會錫吓身，巴塞今仗小勝味道堅濃厚。