紅魔保前4 炸爆愛華頓

猪拉多纳

今晚英超早場愛華頓主場激鬥曼聯一樣咁精彩，「紅魔鬼」上季兩大廢柴費蘭尼同艾舒利楊格（A楊）今季成功獲改造成超強武器，「爆炸頭」曾「炸死」多支勁旅，今場倒戈「拖肥糖」，隨時又會「炸爆」舊東家；「雀屎王」A楊唔知係咪受到雀屎嘅「激發」，今季愈踢越有。有佢兩個再加上朗尼、桑馬達同傷愈復出嘅尹佩斯，曼聯W得！

（now 621周日晚8時30分直播）
費蘭尼A楊呢期勁掂

「爆炸頭」費蘭尼今季喺尹戈爾執教下重現「爆炸威力」，聯賽入咗5球，曾「炸死」熱刺、利物浦同曼城等多支前列勁旅。雖然費蘭尼喺上場作客車路士一仗畀對手封死，但愛華頓防守力同車仔差好遠，中場占士麥卡菲又因傷上陣成疑，想守住「爆炸頭」，恐怕有心無力。至於喺開幕戰對史雲斯食雀屎而變身曼聯大紅人嘅A楊近日為自己大平反，話自己當時根本冇食到雀屎，而係有人惡搞片段整蠱佢，但無論如何A楊今季已被重新激活，助攻入波瓣瓣有，仲搶埋全英超身價最高嘅迪馬利亞嘅正選位添！

愛華頓今季表現大跌Watt，上季嗰種遇強愈強嘅性格消失咗，嚟到季尾已經冇嘢好爭，不過好彩亦唔使護級，球員依家心態放鬆，鬥志成疑，反觀排緊第3嘅曼聯數字上前4位置未算好穩，佢哋上場輸畀榜首車仔，今場冇乜本錢再失分，戰意旺盛下一於撐曼聯嗒「糖」攞晒3分！