莫帥排陣 神鬼難測

猪拉多纳

車路士領隊莫連奴貴為一代名帥，睇佢教波真係獲益良多，撇開一概口舌之爭，單從執教角度而言，甚少有人彈佢，連英國資深評述員馬田泰萊同桂神傾偈嗰陣，都對呢位相當有料、工作勤力兼投入嘅領隊讚不絕口。

上輪車仔擊敗近況大勇嘅曼聯，莫帥寧棄華麗而取務實，將法國新彗星葛特蘇馬從中堅移前一格，夥拍尼曼查馬迪打雙防中，針對費蘭尼、安達靴里拉、桑馬達等弗爆紅魔，令後者空有控球優勢，但點都攻唔入呢架「大巴」。莫帥深明積分上領先曼聯成條街，只要唔輸亦變相減低對方爭標機會，最後更憑夏薩特嘅突擊擸晒3分，莫帥再次向大家證明攻勢唔使多，最緊要到肉。
係攻係守睇中場人選

今晚英超車仔作客阿仙奴，由於冠軍幾近到手，莫連奴未必再用呢招，因為今仗無論贏和輸，對車仔最終奪冠都影響不大，莫帥不妨出奇招同兵工廠鬥攻，畀一個驚喜球迷。

不過，究竟用乜嘢指標來定義車仔今仗玩華麗定玩實際呢？如果莫帥起用雙防中的話，即係表示會打實際波，同上場一樣穩字行先；但若然佢派出多名攻擊中場搏殺，即意味住佢哋想同阿仙奴鬥入波，到時大家留意中場出啲乜嘢人選就會有分曉。連調兵遣將都咁神鬼難測，令人引頸以待，呢啲咪正正係莫帥魅力所在囉！
金句

要奪標，莫帥取實際棄華麗