拜仁盃賽殺多鋪

猪拉多纳

聯賽提早封王冇後顧

德國盃四強今晚先演重頭戲，德甲班霸拜仁慕尼黑主場迎戰死敵多蒙特，今場係多蒙特功勳教頭高普最後領軍挑戰拜仁，拜仁高層亦準備獻花為佢送別，對於拜仁教練哥迪奧拿嚟講，今場又點可以喺主場失威？事實上多蒙特現階段亦欠缺喺安聯球場爆冷能力，推介拜仁慕尼黑上盤。

（TVB 13周三凌晨2時30分直播）

拜仁近期喜事重重，上周中於歐聯瘋狂反勝波圖殺入四強，跟住又多得慕遜加柏幫手擊敗次席禾夫斯堡，成就球會史上第25個德甲冠軍，加上聯賽對哈化柏林輕裝上陣留力，準備今場搏殺，賽前仲接連接獲好消息，超人洛賓同中堅貝拿迪亞雙雙傷愈復操，今仗都有機會復出，更添哥帥籌碼。今場係執教多蒙特七年嘅狂人教練高普領軍最後一次對拜仁，拜仁高層已經準備賽後為佢舉行獻花儀式，尊重呢位近年最強對手。對於拜仁一眾戰將，尤其教練哥迪奧拿，當然要加多兩錢肉緊，幾大都唔肯失威之後再向對手獻花咁瘀。
多蒙特走晒樣爆冷乏術

多蒙特今季戰績大幅滑落，除咗因為近季遭拜仁挖角損失重心外，近季多宗失敗收購加上傷兵成災亦種下禍根，現時球隊鋒線只有馬高列奧斯單天保至尊，奧巴美揚同香川真司每遇強隊都水準不穩，其餘米希達利恩，恩莫比尼，阿祖安拉莫斯同奇雲甘保爾都係失敗收購，令佢哋無法複製近季多番克制拜仁嘅搶逼快攻戰術，今季聯賽已經遭拜仁雙殺，近兩仗遇弱旅雖然總算贏波重拾多少信心，但目前戰鬥力同全盛時仍相差好遠，加上門將維丹費拿同中場大將根度簡分別因傷病缺陣，更難旨望喺安聯球場發圍。