鐵三角生性ＰＳＧ轟散梅斯

猪拉多纳

今晚法甲有場補賽由巴黎聖日耳門（PSG）主場迎戰梅斯，PSG對上兩場聯賽雖然冇咗停賽嘅伊巴謙莫域，好彩南美鐵三角卡雲尼、拿維斯及柏斯托尼生性輪流發威，主場迎戰尾二嘅梅斯續缺伊巴依然冇有怕，捧讓球主勝。

（TVB 302周三凌晨3時直播）

伊巴謙莫域早前因為侮辱法國足球被足總罰停賽4場，雖然後來上訴成功減刑至3場，不過伊巴仲要坐埋今場波監才可以喺周末對南特嘅聯賽復出，好彩對上兩場聯賽球隊冇咗佢表現唔單止冇走樣，甚至比有佢在陣有過之而無不及，分別以3比1、6比1大比數擊敗尼斯及里爾。除咗踢番正箭頭嘅卡雲尼連續兩場有士哥，兩名阿根廷攻擊手拿維斯和柏斯托尼加埋入咗5球，可謂全民皆攻，依家佢哋喺榜首同里昂鬥得難分難解，失1分都嫌多，爭勝決心十足。
梅斯今季作客僅1勝

梅斯近3場聯賽2勝1和，近況唔錯，可惜季中失分太多，目前依然排尾二，距離安全線8分，要望奇迹出現先至唔使做升降機。球隊今季踢咗17場作客聯賽只得1勝，當中有13場無法取得入球，係全法甲作客成績最差嘅球隊，來到PSG主場想搶分簡直難比登天，一於捧讓球主勝。