拜仁上盤歡送蜜蜂首領

猪拉多纳

德國盃4強重頭戲今晚爆發，啱啱喺德甲提早封王嘅拜仁慕尼黑，主場決戰死對頭多蒙特，簡直係恩怨情仇大電影。賽前拜仁提出喺安聯球場舉行歡送儀式，打算喺「蜜蜂首領」高普離開多蒙特前送上最高敬意，加上剛啱封王氣勢如虹，今場又點會肯失威呀？讓一球捧上盤！

（TVB13台周三凌晨2:30直播）

由於禾夫斯堡尋日凌晨作客以0:1不敵慕遜加柏，拜仁以15分榜首優勢，提早4輪奪得聯賽錦標。呢次係拜仁近52年嚟第3次喺30輪聯賽或之前提早奪冠，佢哋除咗連續3年封王，更加係歷來第25次登上德甲冠軍寶座，同時亦係今季歐洲5大聯賽中，冠軍最快到手嘅球隊，淨講紀錄都講到口水乾。不過賽後教練哥迪奧拿話明，禁止球員開P慶祝喎！
狼堡輸波德甲3連霸 哥帥禁開P慶祝

點解？因為拜仁仲有德國盃同歐聯要打呀，雖然洛賓傷愈可以踢得，但由於列貝利未好番，哥迪奧拿梗係唔會輕敵啦！仲有，賽前拜仁高層提議為高普舉辦離隊前嘅歡送獻花儀式，多蒙特已經接受咗，如果拜仁唔係信心爆棚入決賽，又點會喺安聯球場搞咁多嘢呀！
高普走人引發離隊潮

另一方面，雖然多蒙特連贏兩場反彈，奧巴美揚同香川真司又翻生，問題係馬高列奧斯傷愈復出後狀況似未操起，加上高普走人嘅消息已經引發多蒙特出現離隊潮，軍心同士氣嚴重受損，呢個時候硬撼拜仁完全冇着數，好大機會連續3次對賽輸波。
盤路解碼：拜仁近8場主場有7勝1負。

Data King：多蒙特半場少領先

‧拜仁近8場有6次開半場入球細。

‧拜仁近9場有8次開角球細。

‧多蒙特近5次交手有3次先開紀錄。

‧多蒙特近12場得1次半場領先。
乜都玩錦囊：拜仁喪搓波捧角球細

拜仁喺哥迪奧拿執教後，更加鍾意玩控球在腳，加上翼鋒列貝利同洛賓之前養傷，全場搓嚟搓去自然更難出現角球，所以佢哋近9場有8次開角球細，就算洛賓今場傷愈踢得，都係揀1.59倍角球細實際啲。