侯城發窮惡抵撐

猪拉多纳

紅軍躉嫌波飛貴 杯葛入場

季尾波最講鬥志同決心，力爭護級嘅侯城今晚會喺英超獨腳戲火併利物浦。「老虎」一旦要降班，全體職球員就要減一半人工，今鋪發窮惡實會同愈踢愈沉、兼有Fans嫌波飛貴杯葛入場嘅「紅軍」死過，信侯城前鋒達美尼度耶再做雷霆救兵，「老虎」受讓平半撐「下盤」！

（now621台周三凌晨2:45直播）

呢場波原先安排喺今個月18號踢，但由於早排要遷就利物浦出戰足總盃所以改期。主隊侯城家陣位列尾5，領隊布魯士話會方已經有兩手準備，一旦護級失敗嘅話，包括佢在內嘅全體職球員都要減薪5成，加上嚟緊仲要面對阿仙奴、熱刺同曼聯等勁旅，對住態沉嘅利物浦唔搶分等幾時？
史杜列治或提早收咧

「老虎」上仗憑達美尼度耶梅開二度，作客2:0砌低水晶宮錄得2月以嚟首場勝仗，呢位喺冬季轉會窗加盟嘅塞內加爾射手，今季8次正選入咗5球，今晚擔正話唔埋又係靠佢數胡。

利物浦喺足總盃4強出局，上仗鬥西布朗又和波失分，爭英超前4機會非常渺茫，班球員仲會唔會搏命係一大疑問。尋晚仲有消息話，今季飽受小腿、大腿同臀部傷患困擾嘅史杜列治，極有可能提早收咧。更慘係「辛克利精神」球迷組織炮轟「紅軍」波飛太貴，今仗造訪侯城竟然賣到50鎊（約590港元）1張，所以決定拉隊杯葛唔睇，截至前日已經有500人響應。球迷唔撐，球員鬥心又麻麻，仲點信得過呀？