CCJ更堅皇馬-2冇有怕

猪拉多纳

「BBC」唔齊腳使乜驚呀，仲有「CCJ」！今晚西甲「二哥」皇馬主場迎戰尾四嘅艾美利亞，雖然「BBC」兩大要員賓施馬同加里夫巴利續抖，但C朗唔使擔心冇好拍檔，因為佢夥拍查維亞靴南迪斯同「J神」占士洛迪古斯組成「CCJ」鋒線更有效率，就算讓兩球都撐皇馬讓球主勝。

（now 632周四凌晨2時直播）
「小豌豆」博留隊瘋狂搶胡

賓施馬及加里夫巴利喺上周中歐聯8強次回合惡鬥馬體會因傷缺陣，主帥安察洛堤焗住用查維亞靴南迪斯同占士洛迪古斯夥拍C朗，反而收到奇效，「小豌豆」唔單止對馬體會一箭定江山，之後於聯賽對切爾達又梅開二度，而且三個入波都係來自C朗同「J神」助攻，睇嚟呢個全新嘅「CCJ」組合一樣咁夾。況且曼聯主帥尹戈爾近日講明，就算「小豌豆」返曼聯都係打後備，佢梗係力爭留喺「銀河艦隊」，今仗對住排第17位、有中場費蘭度蘇利安奴、後衞米高馬些度及法蘭斯高韋利斯倦勤嘅艾美利亞，仲唔搏命表演咩。

而占士洛迪古斯今季入波同助攻達「雙雙」數字，凡有佢上陣，皇馬勝率高達80%，值得一提係挪威16歲神童馬田奧迪加特，今仗獲擢升入一隊名單，隨時有機會披甲。加上「銀河艦隊」近四次對艾美利亞全部贏三球或上，總共轟入21粒，讓球主客和皇馬要讓到兩球都冇有怕，照捧讓球主勝。