符碌獅吼唔驚阿聯

猪拉多纳

澳職季後賽Kick Off！

澳職季後賽今日開波喇！睇咗澳職咁多年，好多球隊無論常規賽踢得幾好，但一去到一場過嘅季後賽就會失準，成季努力「一鋪清袋」！今日打頭陣嘅阿德萊德聯主場對布里斯班獅吼，唔係講笑，「阿聯」隨時畀符碌入圍嘅「獅吼」咬死！「獅吼」因為珀斯光輝被取消資格先有份踢季後賽，成班球員根本無壓力，加上近年佢哋專剋「阿聯」，今場受讓半一要捧下盤。

（有線64、203周五下午5:30直播）
近6次作客交手全勝

「光輝」係因為財政問題被取消季後賽資格，由原本排第7嘅「獅吼」補上，而更加有運嘅係，「獅吼」首圈就有得作客去阿德萊德聯。作客都話好？「阿聯」排常規賽攞第３喎！原來「獅吼」近6次殺到「阿聯」主場，竟然全部贏晒，當中包括2012/13球季季後賽首圈，佢哋同樣作客踢「阿聯」出局。一來心理上有往績優勢，再加上依家毫冇包袱，大有機會踢出超水準。

論整體實力，「阿聯」的確係高少少，不過佢哋後防馬朗尼停賽，前鋒迪捷特鼠蹊部受傷，今場上陣成疑。阿根廷中場靈魂卡路斯卡受傷好番冇耐，狀態唔知點。佢今季8次缺陣，「阿聯」就輸咗5場，顯見佢係核心人物！事實上「獅吼」打算派出魯克巴坦專門凍結卡路斯卡，睇番之前兩隊對賽，已經證實「獅吼」呢個策略係Work嘅，所以今場偷雞成功一啲都唔令人意外囉！