降班SOS 搶救遇溺3兄弟

猪拉多纳

英超競爭不嬲都咁刺激，今年同往年一樣，護級形勢超緊湊，真係未到最後都唔知邊3隊下季英冠見！「護級三兄弟」昆士柏流浪（QPR）、般尼同李斯特城今季齊由英冠升英超，但依家同處護級漩渦中掙扎浮沉，降班危機深重，嚟到最後幾周生死存亡關頭，當然希望對手們幫幫忙，正所謂今日留一線，他日好相見嘛！QPR同般尼今晚分途作客對住心態上已收咧嘅利物浦同韋斯咸，都係靠戰意搶分；反觀李斯特城雖有地利，但對手紐卡素仲未上岸，肯定有惡鬥。
ＱＰＲ細兇夾狼狙擊紅軍

以27分排緊尾二嘅昆士柏流浪今晚會作客名大於實嘅利物浦，自從喺足總盃4強出局，爭前4近乎絕望，紅軍已經成隊散晒。季尾波，鬥志緊要過實力，ＱＰＲ今場嘅戰意肯定高過紅軍好多，受讓可一博，紅軍近期攻力曳爆，玩埋細都仲得。

（now 621周六晚10時直播）
利物浦前鋒冇個掂

ＱＰＲ今季試過作客13連敗，但為咗護級，球員嘅小宇宙被激發出嚟，近兩場作客錄得1勝1和，其中一場更係大炒西布朗4比1，上月中旬喺主場對榜首車路士都係僅輸1粒，而且仲要係臨完場先輸，所以話呢啲護級球隊發起惡嚟，真係唔係人咁品。

相反利物浦今季又一次冇盃落袋，連續兩場失分後爭前4希望亦告幻滅，成班波踢到冇厘神氣，而且呢排進攻勁濕滯，射手史杜列治提早收咧，史達寧太獨食，一味死扭爛扭；難得正選嘅巴洛迪利繼續敗家，同隊波格格不入，搞到前線靠晒菲臘比古天奴一個，真係冇眼睇。紅軍依家士氣曳又唔識入波，讓唔起ＱＰＲ。再睇番對賽往績，紅軍對上4次主場對住ＱＰＲ都開細，今場細盤都值得考慮。