韋斯咸Hea踢般尼受讓有計

猪拉多纳

般尼依家包緊尾，嚟緊每場波都好重要，佢哋近5仗雖然未贏過但表現唔差，今晚作客面對已經上岸踢緊風流波嘅韋斯咸，相信「錘仔幫」會放鬆嚟踢，令般尼有望搶分，阿謙捧讓球客勝。

（now 623周六晚上10時直播）

般尼現時只係落後尾4嘅李斯特城只係5分，聯賽尚餘4輪，故數字上仍有望逃出生天，故戰意唔使懷疑。般尼近5場聯賽雖然贏唔到，但面對實力分子如阿仙奴、修咸頓同愛華頓都只係僅敗或者輸兩球，亦曾摸和熱刺，可見呢班波唔係想像中咁差。般尼雖有中場馬恩尼同後衞奇雲朗因傷長抖，但翼鋒艾殊利班尼斯停賽期滿復出，攻力增強下，只要保持近期嘅水準，絕對有力搶到分。
錘仔幫傷兵成籮

至於排喺積分榜11位嘅韋斯咸，自1月喺英足盃擊敗布里斯托城後，近13場賽事只係贏過1場，明顯已經冇心再爭取更高排名。「錘仔幫」近期面對榜下游球隊昆士柏流浪同李斯特城都要失分，可見呢班波狀態認真麻麻，加上有後衞雲斯頓列特、湯堅斯、迪美、中場桑治、前鋒安祖卡路爾同迪亞法沙高全部因傷缺陣，實力大幅削弱下，今仗就算有主場之利都未必會有分落袋，阿謙一於鋤強扶弱，撐般尼讓球客勝。