大忙仁•懶阻利華搶前三

猪拉多纳

被譽為戰術大師嘅拜仁主帥哥迪奧拿近期相當煩，歐聯八強戰對波圖首回合先發生「神醫門」事件，令佢備受卸責批評；跟住剛周中德國盃準決賽苦戰百二分鐘，喺主場被死敵多蒙特淘汰出局，更惹起拜仁名宿圍攻，現任評述員嘅希馬怪責佢將未十足傷愈嘅洛賓再度用傷，搞到要缺陣歐聯大戰；馬圖斯亦怪佢將球員放喺唔適合位置，排陣混亂種下輸波禍根。

即使哥帥向來我行我素，一向當名宿意見係耳邊風，但主席路明尼加賽前話，拜仁絕對唔會滿足於只得一個冠軍，既然德國盃已出局，佢就不能不正視問題。拜仁今晚作客利華古遜踢聯賽例行公事，好可能以B隊敷衍了事，因為下周中作客魯營對巴塞隆拿嘅歐聯準決賽首回合實在太重要，球隊目前仍然傷兵滿營，列貝利、阿拉巴同畢斯杜巴復出無期，洛賓同羅拔利雲度夫斯基喺不足四日前對多蒙特受傷亦肯定缺陣。拜仁喺德甲已提早封王，拿姆、堤亞高艾簡達拿、沙比阿朗素、貝拿迪亞同祖安巴尼特等主力預期都會休息，一批小將同後備包括米素爾韋沙、施巴斯坦洛迪、基安盧卡加甸奴同久疏戰陣嘅老將比沙路將會獲得重用，前線上18歲小將施蘭卻特仲好可能人生首次喺德甲出任正選，殘陣出擊擺明留力歐聯。
利華古遜讓得起拜仁B隊

相反利華古遜戰意加零一，佢哋同慕遜加柏嘅三哥爭奪戰十分激烈，喺聯賽尚餘四輪落後兩分，要急起直追，事實上利華近況當弗，近9場聯賽7勝2和，近4場主場全勝轟入13球一球不失，何況佢哋主場打拜仁一向有辦法，近6次主場對拜仁只逢一敗，今屆德國盃亦踢到互射12碼至被淘汰，如今雙方戰意一天一地，加上拜仁陣容太殘，難怪利華古遜要讓番轉頭，黑柴相信利華可以順利喺主場贏波，小讓平半撐上盤。

（有線61及64台周日凌晨零時30分直播）