戰意比實力更重要

猪拉多纳

臨近季尾，一隊波表現嘅好壞，戰意、決心往往比實力更重要。周中侯城將士用命擊退利物浦，來季4支歐聯英超代表，似乎經已塵埃落定。現階段嘅阿仙奴及曼市雙雄，目標係鬥搶分直入分組賽。

自從作客0:1不敵車路士，曼聯早已宣布無緣爭標，上仗作客慘吞愛華頓3蛋，尹戈爾賽後話早喺班球員熱身嗰陣，已經知紅魔冇乜決心同士氣，輸波係意料中事，最慘係朗尼又因膝傷提早收咧，進一步削弱曼聯嘅實力，依家紅魔唯一想搏殺嘅原因，可能就係保住個飯碗，避免被清洗。另邊廂，英超護級形勢比爭標更緊湊，暫時未有球隊篤定降班，由第13位嘅西布朗，一直數到包尾嘅般尼，通通有機會跌落地獄，呢個亦係今季英超剩番嘅唯一看點，且看今晚曼聯惡鬥西布朗，會否令形勢有所改變吧。

（now621台周日凌晨0:30直播）