祖記分森 歐聯咪亂捧

猪拉多纳

森多利亞今晚喺意甲主場對祖雲達斯，或者可以阻止到對手提早封王。雖然森多近況嚴重跌Watt，但「斑馬兵團」跟手就要喺歐聯4強首回合作客皇家馬德里，依家喺聯賽咧住14分，大把失分空間，唔留力等幾時？森多受讓一球咁爽，1.6倍「讓主」有得諗！

（TVB301周日凌晨0:00直播）
森多力保歐霸資格

排喺聯賽榜第5位嘅森多，日前喺主場被維羅納逼和1:1後已錄得5戰不勝，而中場艾古亞嚟緊又要停賽，不過由於仲要搶分保住下屆歐霸盃參賽資格，相信都會同「斑馬兵團」鍊過。再講，森多教練米赫洛域球員時代曾効力國際米蘭，對祖記呢支宿敵怨恨甚深，又點會畀對方好過呀？

祖雲達斯喺主場以3:2砌低費倫天拿後，現時以14分領先次席嘅拉素，只要今場贏波，就可以提前4輪賽事封王，教練阿里基賽前仲誓神劈願話，已經落柯打今場一定要贏，等球員可以專心備戰對皇馬嘅大戰。只不過，做唔做到係另一回事囉！
或收起泰維斯 派路

事實上，「斑馬兵團」陣中唔少主力，好似中場保羅普巴、後衞邦路斯同艾拉仲未好番，射手泰維斯同老將派路今場係咪會正選上陣都好難講，難怪曾經帶領祖記奪得無數錦標嘅納比，賽前都暗示祖記未必會喺今晚提早攞冠軍，信佢大家識做啦？