車仔約定你開香檳

猪拉多纳

大勝封王提早慶宮

英超王者今晚誕生！榜首車路士今仗主場只要擊敗水晶宮，就可以提早開香檳慶祝聯賽封王。車仔整季演出平穩，拋離各大豪門幾條街，但卻被譏諷係「悶蛋足球」，令領隊莫連奴非常不爽。既然捧盃在望，加上對手較弱，相信「寸王」唔介意以悅目進攻戰術，做齣好戲勁炒水晶宮，令批評者心服口服。水晶宮近期二連敗，擺明已放軟手腳等抖暑，無謂阻住車仔開派對，直取讓球主勝。

（now 621周日晚8時30分直播）
唔擺大巴喪攻冧粉絲

車路士對上一次捧英超冠軍已經係5年前，球隊等重奪呢項錦標，真係等到頸都長埋。同埋領隊莫連奴首次率領車仔捧英超，剛好就係10年前，對「寸王」而言可謂別具意義，亦證明老闆阿布拉莫域搵佢重掌車仔帥印絕對係明智之舉。

不過，車仔上周日守和阿仙奴，為奪冠奠下重要基礎，但被輿論批評淨係識擺「大巴陣」死守，非常沉悶。雖然莫連奴開腔反擊，並寸阿仙奴多年無緣英超冠軍先至最悶，但相信「寸王」都希望踢悅目足球，以博取球迷掌聲，兼令批評者收聲，上周中作客李斯特城，下半場一踩油，即刻反勝3比1，以車仔今季聯賽主場8成勝出率，炒得起水晶宮有餘。
水晶宮等抖暑無謂搏

值得一提，車仔上季季尾意外輸畀水晶宮，間接導致失去爭標機會，今次勢必報仇咁仇。至於水晶宮早前係威係勢，取得4連勝，包括擊敗曼城，但近期已經打回原形，連續兩場主場都捧蛋，擺明因為已經攞夠分，冇咗護級壓力後成隊波鬆懈晒，去到史丹福橋恐怕只能夠戥人威，難逃被炒厄運。