山度士主場復前失

猪拉多纳

巴西聖保羅省聯賽決賽次回合，山度士主場對彭美拉斯，雖然山度士首回合輸0比1，但呢支曾20次捧巴省聯冠軍嘅老牌球隊，今屆10次主場出擊，取得8勝2和，加上兩位前AC米蘭球星羅賓奴、奧利華拉回巢後，表現翻生，絕對夠籌碼收復失地，山度士主W1.9倍值博。

(周一凌晨3時開賽、馬會網上文字直播)

賽事不計算作客入球優惠，亦不設加時，兩回合總比數打和，即以互射12碼分勝負。山度士要追1球並唔難，因為球隊擁有一流鋒線，34歲嘅奧利華拉曾經効力AC米蘭、貝迪斯等歐洲球會，佢今年1月重返山度士，迅速融入球隊，已於今屆巴省聯轟入10球，高居射手榜一哥。至於前皇馬前鋒羅賓奴入波數字唔多，但勝在名氣大，可大大牽制對手防線，有佢負責策劃攻勢，奧利華拉唔愁冇波入。
往績食住彭美拉斯

彭美拉斯首回合贏波，帶有幸運成分，事實上，佢哋近10次鬥山度士，只有2勝2和6負，加上過去6次作客山度士，有5次輸波而回，想保住勝果相當困難。同埋彭美拉斯上周中踢多1場巴西盃，隨時回唔切氣，形勢悲觀。