寸王半季帶出實掂 狂野大巴衝到尾

猪拉多纳

車路士今晚喺英超主場迎戰水晶宮，唔止係倫敦打吡戰，仲好可能係車仔事隔5年，重奪英超錦標嘅冠軍派對。或者大家覺得，今季車仔贏得超悶，但其實寸王莫連奴嘅執教生涯中，8次領軍得到半程冠軍，全部成功放到尾過終點，簡直揸大巴都做到「狂野時速」主角，點到你唔服呀？

雖然莫連奴嗌車迷唔好驕傲住，預期水晶宮會作出頑強抵抗，但實際上，幾乎全世界都覺得車仔今晚會贏波封王，史丹福橋球迷已經買定香檳慶祝。傳媒仲發現，寸王最叻放到對手食塵，過去帶領波圖、車路士、國際米蘭同皇家馬德里，先後8次喺聖誕前撇甩對手，一放到底拎埋聯賽冠軍。
領放274日破費Sir紀錄

最近有唔少人批評車仔踢法沉悶，但正如莫連奴話齋，車仔嘅入球數字，比起自稱踢進攻足球嘅阿仙奴更多，意思係佢揸大巴，都可以靠技術鍊贏人哋嘅超級跑車。同埋今季車仔喺第3周開始坐榜首，如無意外，完成收咧戰後會連續274日喺榜首領放，打破94年費格遜喺曼聯創造嘅262日領放神迹。
泰利入波 登車仔後衞士哥王

所以話，車仔班球員唔似會因為冠軍在望收油，反而可能鍊盡啲，證明莫連奴手車有幾辣。況且寸王身邊仲有其他狂野車手，例如夏薩特已經當選今季英格蘭球員先生，泰利對李斯特城攻入個人職業生涯第38個英超入球，只要再有士哥，就會成為球會史上入波最多嘅後衞，今晚大家一於見證車仔嘅速度與激情啦！

（now621 今晚8:30直播）