AC盡地一煲 唔赦里

猪拉多纳

踢好波氹新老細 意甲 02:45 （日）68 拿玻里 Vs AC米蘭

作為意甲傳統班霸，AC米蘭今季表現可謂慘不忍睹，不過「紅黑救星」終於到喇，泰國富豪Mr. Bee已飛抵米蘭，只要佢同AC老闆貝魯斯干尼傾埋收購上嘅最後細節，今日就會正式公布呢單嘢，AC來季勢必大換血，班球員為保飯碗必定搏盡，今晚作客疲兵拿玻里有力搶分而回，捧2.8倍「讓球客勝」。

（TVB301周一凌晨2:45直播）

AC米蘭近年債台高築，貝魯斯干尼一早已經意興闌珊，一直搵緊買家，家陣終於等到泰國富豪Mr.Bee出價5億歐元收購49%股份（見另文），據講Mr.Bee已承諾會掟1億歐元喺今夏收購球星，重組巨型班挑戰各項錦標，換句話說，好多舊將應該冇得留低，當中最危嘅，就當然係少帥恩沙基啦！其實恩沙基早前已多次傳出飯碗不保，尤其係周中不敵熱拿亞後，《米蘭體育報》更言之鑿鑿話恩沙基已經被炒，但最新消息係恩沙基會繼續留任，起碼帶埋今場對拿玻里先，好明顯係將佢嘅前途留番畀新老細決定。

無可否認，家陣AC米蘭嘅人腳真係麻麻，班老將黃金時期已過，新人又未夠Quali接棒，但有一點大家唔可以忽視，就係呢班波勝在經驗豐富，搏一兩場仲可以，好似首循環2:0擊敗拿玻里嗰場波咁，就係「紅黑兵團」今季其中一場代表作，依家AC處於關鍵時刻，相信班球員都會落力踢番場好波。
下周中踢歐霸4強 拿玻里未必砌盡

拿玻里近期聯賽同歐霸兩線作戰，4月足足踢足8場波，班球員明顯身心俱疲，周中作客安玻里就擺咗2球老烏，最終以2:4落敗，由於佢哋嚟緊周中歐霸將會上演4強首回合，相比起今場賽事，梗係來仗重要得多，畢竟拿玻里已經26年未攞過歐洲錦標，家陣全隊上下都將集中力放喺下場波，今晚好有機會畀AC米蘭偷到雞！
樂比推介：AC米蘭（讓球客勝）