哥帥In Control 拜仁最巴閉

猪拉多纳

倒戈魯營 摸清死穴

今晚歐聯4強戰兩位主帥—巴塞隆拿嘅安歷基，將會同拜仁慕尼黑哥迪奧拿「同室操戈」。佢兩位球員時代同期做過巴塞同西班牙國家隊隊友，之後做教練就一個教巴塞A隊、一個教B隊，關係密切。不過依家各為其主，為爭歐聯肯定冇情講！相比之下，哥迪奧拿大戰經驗豐富，戰術同布陣亦較成熟，嚟到呢啲關鍵場合更加可靠，拜仁今晚作客撐2.08倍「讓客」！

（有線61、64、201及203、中央5台周四凌晨2:45直播）

今場焦點當然落喺重返魯營球場嘅哥迪奧拿。呢位拜仁教頭08至12執教巴塞嘅4年間，幫球會狂捧14個冠軍，包括3次西甲同2次歐聯錦標，巴塞因而被封「地上最強」。今次領軍倒戈，「哥帥」毫無疑問對佢帶過嘅美斯、恩尼斯達同沙維等巴塞球星瞭如指掌，呢班巨星有乜弱點同死穴，都冇人會清楚得過哥帥。
巴塞50戰勝率王 安歷基戰術調動遜一籌

依家掌管巴塞教鞭嘅安歷基，歐聯8強次回合贏巴黎聖日耳門嗰場，令佢成為球會史上執教頭50仗，勝出率最高嘅教練。大家讚佢之餘，已經唔記得季初曾經鬧過佢冇料到要炒佢。但無可否認，佢打造美斯、尼馬同蘇亞雷斯成為「MSN組合」好成功，不過講到戰術同調動能力，今場對住哥迪奧拿，就隨時被比下去。
拜仁效率頂級 血洗往績心理佔優

對上一次巴塞對拜仁係2012/13歐聯4強，當時拜仁主場大勝4:0，次回合喺魯營再贏3:0，總比數血洗7蛋晉級。往績在前，拜仁班球員心理上可能有優勢，雖然主攻手洛賓提早收咧，羅拔利雲度夫斯基又要戴住面罩搏殺，但佢哋嘅防守力同效率向來頂級，控球能力亦唔輸蝕畀巴塞，今場作客可能但求唔輸，留番次回合返主場先搏殺，今場一於撐拜仁可立不敗之地。
Data King：拜仁交手3連勝

‧巴塞過去4次歐洲賽主場迎戰拜仁只得1勝3負。

‧拜仁近3次鬥巴塞全勝，勁轟9球不失1球。

‧雙方近10次對壘8次開出「半場細」。
乜都玩錦囊：巴塞唔敢搶攻捧「半場細」

巴塞過往喺歐洲賽畀拜仁食住，今戰主場出擊都未必敢貿然搶攻，加上拜仁今屆歐聯客戰屢次碰壁，即使主帥哥迪奧拿熟知巴塞路數，今次造訪魯營相信都會謀定後動，一於追埋1.43倍「半場細」。
頂占筍盤：拜仁（讓球客勝）

盤路解碼：兩軍近6次碰頭開出5口雙。