肥賓打骰 拿玻里殺迪

猪拉多纳

另一場歐霸盃四強首回合，意甲勁旅拿玻里主場對烏克蘭球隊迪尼普，賓尼迪斯不愧為「盃賽專家」，率領拿玻里相隔廿六年再次進身歐洲賽四強，重現馬納當拿時代嘅輝煌，以賓帥歐洲賽主場廿四戰不敗「神績」，可望擊敗迪尼普先拔頭籌，Mic少揀讓球主勝。

（有線62及202台周五凌晨3時05分直播）

拿玻里上一次打入歐洲賽四強，已經係1988/89年球季嘅足協盃（歐霸盃前身），當時有馬納當拿助陣，最終奪得冠軍，亦係球會史上唯一歐洲賽錦標。拿玻里難得再有揚威歐洲機會，老闆迪羅倫迪斯對賓尼迪斯嘅態度有180度改變，由想炒佢變成依家全力挽留佢。雙方續約在望，賓帥自然可以專心為球隊搏殺。賓尼迪斯仍保持歐洲賽領軍主場廿四戰不敗，錄得二十勝四和，其中拿玻里近十二次歐洲賽主場亦有九勝三和佳績，前鋒希古恩腳風超順，喺射手榜僅落後盧卡古及阿倫杜格拉斯一粒，當然想把握餘下賽事爭取入波，攞埋神射手獎。
迪尼普晉級過程忟水

迪尼普近五次對意大利球隊全敗，包括今屆分組賽兩循環被國際米蘭「雙殺」。球隊喺晉級過程亦非常驚險，十六強踢到加時憑作客入球優惠淘汰阿積士，八強亦戰至比賽末段先入波贏布魯日，無法同霸氣十足嘅拿玻里相提並論，今仗淨輸兩球好正路。