墨爾本打吡撐勝利屠城

猪拉多纳

澳職季後賽4強今日上演重量級打吡，墨爾本勝利會喺主場迎戰同市嘅墨爾本城，呢個戲碼上星期甫出爐，成個墨爾本市即掀起撲飛潮，最新消息話已經賣出超過4萬2千張波飛！勝利貴為常規賽冠軍，實力強勁唔在講，而且有接近兩個星期休息回氣，今戰有望踢出最高水準殺入決賽，1.83倍主勝值得支持。

（有線64及203周五下午5:30直播）

勝利連續兩季喺季後賽4強輸波，現役球員中就有5位經歷過呢兩次失望，守將布洛斯咸話已經吸取教訓，佢同隊友「見過鬼怕黑」，今季肯定會全力避免再衰多鑊。事實上勝利主場表現穩定，今季3場墨爾本打吡雖然作客輸過0:1，不過兩次主場分別大勝5:2同3:0，今戰佔地利自然信心爆棚。
勝利抖兩周叉足電 墨爾本城唔齊腳

更着數嘅係，勝利最後3場常規賽贏晒之後，抖咗差唔多兩個星期，家陣呢班波得門將尼敦高爾一件傷兵，羅倫斯湯馬士頂替佢把關近5場只失3球，表現唔曳；相反「墨城」就硬仗連場，今場係佢哋接近3星期內連續第4場客戰，舟車勞頓體力可能受影響。

其實勝利今季喺常規賽拋離「墨城」18分，兩隊實力差距一啲都唔細，加上「墨城」有占姆士布朗、加魯斯奧、維拿特、卡列斯比同杜夫等傷兵，即使後防查利安斯波監刑滿復出，作客都好難夠勝利砌！
頂占筍盤：墨爾本勝利（主勝）