般尼唔掂侯城送佢返英冠

猪拉多纳

同晚英超護級大戰，尾4「老虎」侯城主場火併包尾大幡般尼，般尼依家處境危殆，護級命運已不再掌握喺自己手上，今仗贏唔到便立即降班，但呢班波識守唔識攻，點贏經驗豐富嘅侯城呀？「老虎」小讓平半值捧。

（now 621周日晚10時直播）

目前包尾嘅般尼只得26分，比尾4「安全線」嘅侯城少8分，前者唔單止要喺剩番3輪贏晒，仲要望其他競爭對手失分，但機會非常渺茫，假若般尼今仗攞唔晒3分，就會「即時死亡」。雖然季尾波戰意行先，般尼整體實力太曳，尤其係攻力極度疲弱，至今入得26球為各隊最差，佢哋已連續6場冇士哥，對上一個入波要數番去3月中爆冷擊敗曼城嗰球，查實般尼近9仗亦只係得嗰球進帳，波都唔識入談何護級？
莊家睇好上盤低水

侯城一度6場不勝跌至下游，但呢班波護級經驗豐富，嚟到季尾關鍵時刻便嚟料，之前連贏水晶宮同利物浦，搶到救命6分，而且近6次主場錄得3勝1和2負，上仗佢哋雖不敵阿仙奴，但養傷一排嘅前鋒謝拉趕及復出，今仗必拚盡爭勝，順便送般尼一程，讓球盤侯城小讓平半兼低水，備受莊家睇好，斯維強捧「老虎」上盤。