尹戈爾羅渣士教壞雙紅

猪拉多纳

英超兩大紅衣名牌曼聯同利物浦，今季戰績差強人意，同樣落得四大皆空收場，雙方教頭、荷蘭老帥尹戈爾同來自英倫三島嘅羅渣士要負最大責任。兩人經常於排陣上左換右換，永遠唔確定打4人防線抑或3後衞陣式，每當落後情況嗰陣，佢哋又缺少Plan B，即係冇應變計劃去扭轉敗局。

喺買人方面，太過着重華麗而欠缺實際，好似巴洛迪利、迪馬利亞、法卡奧等球星來投後都冇貨交，試問成績又點會好呢？雖然嚟到季尾，利物浦仍有機會爭前4嘅歐聯入場券，但要過曼聯頭又談何容易呢？
護級戰場主隊秤先

講番今晚英超，曼聯自從不敵非華麗而實際嘅一哥車路士後，接連再輸畀愛華頓同西布朗，依家只係比第5嘅利物浦多4分，為保前4席位，今仗作客水晶宮不容再失，預計紅魔可以贏番場反彈。

至於護級形勢非常刺激，侯城主場對般尼、紐卡素主場對西布朗、阿士東維拉主場對韋斯咸，3支主隊為免降班，必定趁有地利搏盡搶3分，值得秤先少少。