皇馬華倫大駁火

猪拉多纳

(六)43 皇家馬德里 VS 華倫西亞

西甲重頭戲皇家馬德里主場對華倫西亞，雖然皇馬將於下周中歐聯4強同祖雲達斯決生死，但聯賽亦進入大直路，「銀河艦隊」冇得保留，必定搏盡搶分。「蝙蝠兵團」華倫西亞亦要力保前4參加下屆歐聯，同樣冇失分空間。今場大細中位數調升至3.5球，已預示雙方會大駁火，照跟揀入球大。

（now 632周日凌晨2時直播）

皇馬剛於周中歐聯4強首回合作客1比2不敵祖記，理論上今場聯賽可能會留力下周中次回合搏殺。不過現實唔容許「銀河艦隊」咁做，因為佢哋仍落後榜首巴塞隆拿兩分，喺剩番3場聯賽下，如果再失分真係冇得追，所以皇馬眾星都要頂硬上盡砌。
收入壓美斯 C朗出力賑災

皇馬主力正值當打，體力唔成問題，尤其C朗仲要同美斯爭神射手寶座，更加唔會錫力。根據《福布斯》統計，C朗上年收入達7,900萬歐元（約6.8億港元），比次席美斯多850萬歐元。呢位「慈善天王」代言嘅慈善組織捐咗700萬歐元（約6,000萬港元）畀尼泊爾地震災區兒童。

第4位嘅華倫西亞只領先第5位西維爾3分，稍有閃失隨時無緣下屆歐聯，作客都焗攻。中場柏利祖大勇連續3場有波入，皇馬防守向來麻麻，「蝙蝠兵團」有權入波捧大盤啱數。