喜鵲亂龍 益晒西布朗

猪拉多纳

班主領隊球員粉絲互插

英超護級形勢相當緊湊，除咗包尾兩隊般尼及昆士柏流浪九成救唔番，尾3至尾7僅僅相差2分，淨番3輪聯賽每場都要當決賽咁踢，已經8連敗嘅紐卡素近排頭頭碰着黑，將帥不和、傷兵滿營、球迷柴台、負面消息一大籮，今晚主場對西布朗難有起色，平手盤捧2.06倍嘅西布朗。

（now625台周六晚10:00直播）

未分析前先講吓傷停名單，紐記守將米克威廉臣及真馬特要停賽，前鋒施安迪莊則因傷倦勤，加埋長期傷兵迪奧迪、史提芬泰萊及希達拉等，其實「喜鵲」人腳相當緊絀，不過紐卡素最大問題唔係人腳，而係軍心散渙。家陣呢隊波由老闆、領隊、球員同球迷都充斥住唔同問題，8連敗真係「實至名歸」。

樂比之前都講過，卡華接手係「喜鵲」衰落主因，喺呢個咁危急嘅時候，佢唔單止冇幫手團結球員，仲踩多幾腳，話米克威廉臣上仗對李斯特城係故意領紅，此言一出即令輿論嘩然，姑勿論是否屬實，但已可肯定內部矛盾嚴重，最頂癮係日前有記者問卡華會否被炒，佢竟然話自己係英超最佳領隊，從來未驚過，本來有信心係好事，但呢啲環境仲咁講，睇得出佢好明顯係死撐，甚至情緒失控。
李城打起狀態追多鋪

同時，「鵲迷」繼續咬住班主艾殊利唔放，根據英國《鏡報》調查，85%紐卡素球迷寧願降班換取艾殊利離開，呢種置諸死地而後生嘅諗法，真係隨時實現，需知紐卡素球迷極為忠心，連球迷都唔撐，「喜鵲」前景極唔樂觀。

另一場護級大戰我睇好李斯特城，其實「狐狸」今季表現唔錯，但經常贏點數輸波，季尾終於打起狀態，近6場聯賽贏5仗，即使輸畀車仔嗰場都踢得唔曳，今鋪回師地頭對狀態回落嘅修咸頓，1.77倍平手盤值捧。

（now622台周六晚10:00直播）

樂比推介：西布朗（平手盤）、李斯特城（平手盤）