華倫踢密集皇馬好頭痕

猪拉多纳

西甲今周有喜有悲。喜固然係巴塞、西維爾大半隻腳踏入歐聯、歐霸決賽，隨時有機會複製上季西甲獨攬歐洲兩大盃賽的霸業。悲就一定係皇馬似乎難逃歐聯無法蟬聯嘅魔咒，隨時4強止步。加上西班牙政府、西班牙足總、西班牙職業足球聯賽會（LFP）及球員工會亦就下季電視轉播收益分帳出現嚴重分歧，最後兩周罷踢嘅陰霾隨時籠罩西甲。如果最終賽期有所延誤，到時巴塞MSN組合要歸隊打美洲盃，對稱霸西甲及國王盃必有重大影響。

安察洛堤帶領皇馬4月份聯賽6連勝，力追巴塞至僅落後2分，當選最佳教頭實至名歸。但周中歐聯四強首回合對祖雲達斯嘅比賽，將中堅沙治奧拉莫斯推上一格踢防中卻屬敗筆，拉莫斯發揮固然不理想，而讓比比擔任正選中堅更似放咗個計時炸彈喺防線，畢竟呢位葡萄牙國腳近年已過高峰，情況有啲似拜仁嘅丹迪；卡斯拿斯嘅犯錯及加里夫巴利變身隱形人，就更成為球迷嘅批評對象。幸好安帥深受球員擁戴，就算輸波球隊內部仍然團結。

祖雲達斯成功以弱勝強，依靠嚴密嘅部署，而且人人勤力跑多步，加快節奏果斷搶中場，正好為華倫西亞帶嚟多少啟示。早幾個禮拜前，華倫作客魯營就曾以密集防守配合菲侯利喺右邊快速反擊，產生唔少威脅，令巴塞吃盡不少苦頭，「蝙蝠兵團」落敗只因前線把握力不足所致，今晚對住皇馬大可照辦煮碗。由於皇馬下周有歐聯生死戰要翻盤，今晚排陣必然有所保留，呢個更係華倫搶分保前4嘅大好時機。

（now632台周日凌晨2:00直播）