悉尼地頭圍攻阿聯

猪拉多纳

模擬戰術踢Mock Game

「澳職」季後賽4強尋日上演墨爾本市打吡，今日輪到常規賽「2哥」FC悉尼同「3哥」阿德萊德聯互爭決賽權！主場嘅悉尼雖然今季喺聯賽同盃賽4次同「阿聯」交手未逢一勝，不過嚟到季後賽呢啲重要場合就唔同講法。由於首圈輪空，FC悉尼可以作特別練習，據講佢哋派球員模擬「阿聯」嘅陣式同踢法，嚟番場Mock Game，今場肯定作針對性部署。FC悉尼主場出擊值得睇好，撐2.08倍主W啦！

（有線64周六下午5:30直播）

今場大戰前兩軍教頭已唇槍舌劍，FC悉尼艾萊特就「分析」阿德萊德聯踢法屬高Cue大棍一類，「阿聯」嘅甘巴爾就話對手休息太耐，球員會踢唔出水準。唔知艾萊特係咪都覺得唔妥，上周六特別喺麥格理大學安排咗場閉門友賽提升狀態，據報對手係模擬「阿聯」嘅預計戰術同踢法，而且重點係操弗番下半季冇乜上陣機會嘅澳洲國腳中場安東尼斯，加上佢哋陣中有常規賽金靴射手真高孭飛，為衝總冠軍做足準備！
阿聯2主力未必踢得

相反，對家「阿聯」備受傷兵問題困擾，前鋒迪捷特上仗受傷缺陣，今日上陣成疑。中場占士捷高日前又喺操練中傷出，一度傳出傷患極為嚴重，雖然球會已表明佢唔係重傷，但今仗都未必落場，實力肯定打折。就算講狀態，「阿聯」近6場作客賽事都輸足4鋪，今日殘陣闖悉尼，睇怕都係「行人止步」多嘞！
頂占筍盤：FC悉尼（主勝）