季軍之爭馬賽撼唔郁摩納哥

猪拉多纳

今晚法甲尾場上演「三四大戰」，由「四哥」馬賽主場硬撼「三哥」摩納哥，雙方一向有你冇我，馬賽為爭來屆前三嘅歐聯入場券，今仗許勝不許和，但咁大壓力隨時走樣，況且佢哋已經謝謝哋，點讓近廿場聯賽僅一敗嘅摩納哥呢？斯維力撐摩軍讓球客勝。

（TVB 302周一凌晨3時直播）

雖然聖日耳門對馬賽係「法國打吡」，但後者同摩納哥嘅牙齒印都好深，尤其係上世紀八、九十年代雙方鬥到你死我活，馬賽當年嘅賄賂案更震驚全球，摩納哥則喺馬賽用無恥手段稱霸法甲下成為受害者。講番今仗，兩軍亦要為一席歐聯資格爭崩頭，不過馬賽早已不復季初勇態，唔單止季中頻頻失分，上月更經歷恐怖四連敗，徹底退出爭標行列之餘，更跌落第四位，上仗雖擊敗梅斯止瀉，但個勢依然麻麻。
客軍近20戰僅一敗

馬賽現時落後第三位嘅摩納哥五分，聯賽剩餘三輪，如果馬賽今場輸波，固然肯定無法打入前三名，假如和波的話，雙方保持五分差距，要喺最後兩輪收復失地機會亦微乎其微。但踢波嘅嘢，唔係話你想贏就贏到，一來馬賽狀態欠佳，許勝不許和下令加重球員嘅心理壓力，二來摩納哥勢頭唔錯，之前廿場聯賽只嘗一敗，而當中有段時間仲要兼顧歐聯，比起單線作戰嘅馬賽，能有此成績非常難得，前線嘅安東尼馬迪爾與貝拿度施華又愈來愈夾，只要今仗擊敗馬賽，便提前取得來屆歐聯參賽資格，仲有得受讓咁筍，斯維強捧摩納哥讓球客勝。