車仔抗紅唔放水

猪拉多纳

大巴陣阻頭阻細

曼城上輪擊敗熱刺後，英超三甲位置幾乎塵埃落定，剩番第4位嘅曼聯同第5位嘅利物浦爭奪最後一張歐聯入場券。「紅軍」今輪開打前暫以4分落後「紅魔」，能唔能夠爬頭殺入前4，就好睇今晚造訪車路士呢場大戰喇！雖然車仔已經提前封王，但今場喺史丹福橋出擊點可以失威，相信「寸王」莫連奴會繼續採用「泊大巴」戰術，隨時會係悶戰一場，1.78倍入球細值得一試。

（now621今晚11:00直播）
史丹福橋聯賽不敗

車路士上場砌低水晶宮提早封王，仲一早訂咗月尾巡遊慶祝添，所以今晚對紅軍咩戰果都冇所謂，但以莫連奴咁要面子嘅性格，今晚又點會派副選上陣交功課就算，更何況「藍戰士」今場係喺史丹福橋出戰，佢哋今季保持嘅聯賽主場不敗紀錄，又點會畀「紅軍」搗亂檔先！
利物浦死火作客曳

再者，車仔喺歐聯早被淘汰，冇其他戰線要兼顧，毫無後顧今晚一定唔會放軟手腳。小妹預計「寸王」好大機會再出撒手鐧「泊大巴」戰術，以穩守突擊對付利物浦，唔會心急爭取入波。相信今晚球迷又會邊睇邊嗌「車路士啲波悶死人喇」！

利物浦雖然要搶分爭奪來屆歐聯入場券，弊在佢哋近4次造訪史丹福橋未試過贏波不特止，近期作客表現亦都麻麻，對住西布朗同侯城兩支弱旅都失分。最慘係「紅軍」前線火力唔多夠，除咗主力射手史杜列治受傷，史達寧最近表現又失魂落魄，對上幾場頻頻門前失機。既然車路士玩死守，利物浦又冇攻擊力，今場「藍紅大戰」睇怕係悶戰一場，信小妹一於捧1.78倍細。
盤路解碼

莫連奴10次英超領軍鬥利物浦贏8次，勝率80%。
Data King：夏薩特英超扭波王

‧莫連奴帶領車路士96次主場出戰英超，取得75勝20和1負。

‧車仔翼鋒夏薩特係今季英超扭波王（160次）。

‧利物浦近9次聯賽作客7次零封對手。
乜都玩錦囊：車仔冇鬥心讓唔起紅軍

都係嗰句啦，季尾波最講鬥心，車路士封咗王冇嘢好搏，戰意一定唔夠要力爭上游嘅利物浦，況且「紅軍」對上6次造訪史丹福橋錄得3勝2和1負戰績，受讓平半撐下盤有機執半格。