馬體會一肚火 喪炒利雲特

猪拉多纳

西甲 18:00（日）9 利雲特 Vs 馬德里體育會

季尾好多風流波，但今晚西甲早場利雲特主場迎戰馬德里體育會，就一定唔包括在內。利雲特仲未上岸，雖然近3場2勝絕對唔可以睇小，但比起要保住個「三哥」席位嘅馬體會始終爭一皮。「張峰」相信質素較佳嘅馬體會可以攞足3分，捧2.4倍「讓球客勝」啦！

（now632台及TVB13周日晚6:00直播）
利雲特掛住下場對拉科

利雲特護級壓力唔算太大，今晚唔輸就幾可肯定上岸，但對住馬體會唔通鬥攻咩，梗係盡守啦，況且佢哋下輪會火併尾3嘅護級勁敵拉科魯尼亞，換轉你係教練，你都會部署下一場多過今場啦，係咪先？

馬體會就唔同講法，下周要對爭緊聯賽冠軍嘅巴塞，失分機會極高，領隊施蒙尼咁識計數，一定「落柯打」今晚不勝無歸。馬體會上輪主場對畢爾包失咗兩分，其實真係幾唔抵，事關「床單兵團」全場壓住對手踢，食咗3個詐胡，仲要3個當中有兩個係旁證判錯，班波谷埋一肚氣，今晚隨時爆發。翼鋒基沙文當弗，前鋒文迪蘇傑又擔番正，利雲特邊夠砌吖！