曼城阿古路射爆QPR

猪拉多纳

恨攞英超金靴

雖然話曼城今季四大皆空，不過佢哋始終要鎖定前3位置，以便直入下屆歐聯分組賽搵銀，加上射手阿古路講明要成為英超神射手。今晚「藍月亮」主場迎戰英超作客最弱嘅昆士柏流浪（QPR），肯定會大開殺戒，1.5倍「讓主」就算低水都要追。

（now621台周日晚8:30直播）

「藍月亮」早前一度跌落第4位，好在班波及時反彈連贏3仗。家陣佢哋以5分之差力壓第4位嘅曼聯，為咗提早鎖定來屆歐聯分組賽席位，班波今晚邊敢喺鄉親父老面前Hea踢先？何況王牌射手阿古路呢排重拾勇態，連續4仗有「士哥」，呢位目前以22個聯賽入波排喺英超射手榜榜首嘅前鋒，賽前喺曼城官網講明恨攞金靴獎，今次對住英超作客輸波同失球數字最多嘅QPR，實行開大餐都似。
QPR作客失波英超之冠

另邊廂嘅QPR表現勁曳，近10戰輸7仗，更大問題係若然侯城、李斯特城、紐卡素、阿士東維拉4隊喺尋晚一齊贏波嘅話，就算QPR今仗做乜都改變唔到佢哋3年嚟兩度降落英冠命運。即使佢哋避過呢劫，今晚都一定要砌低曼城護級先仲有價講，焗攻之下咪又盞係益咗曼城？點睇QPR呢鋪都係撐唔過囉！