阿仙奴速嗒天鵝冇難度

猪拉多纳

今輪英超壓軸好戲由「三哥」阿仙奴主場迎戰「天鵝」史雲斯。阿仙奴來到季尾愈打愈順，之前10仗聯賽贏咗9場，中場核心辛迪卡索拉發表留隊宣言，以佢哋近期咁搶韁嘅演出，今仗勢必速食呢隻「天鵝」，不妨揀半場主勝。

（now 621周二凌晨3時直播）

以往阿仙奴總令粉絲提心吊膽，無論領先緊1球定4球都未必贏梗，2011年lead住紐卡素4粒都被逼和最為經典，今屆歐聯分組賽亦試過畀安德列治連追3球賽和。好彩踏入2015年，先後有基奧特、奧斯爾、艾朗藍斯傷愈復出嘅阿仙奴，猶如脫胎換骨，除咗歐聯16強意外地遭摩納哥淘汰之外，其他賽事表現強勢，除殺入足總盃決賽，今年15場聯賽豪取12Ｗ，包括近10仗贏咗9場，弗到冇朋友。
卡索拉表態留隊士氣更盛

查實阿仙奴只要冇傷冇病真係大把人用，連早前盛傳會返西甲加盟馬體會嘅辛迪卡索拉，近日受訪時親口證實會留低，並揚言下季要為兵工廠奪得聯賽同歐聯雙料冠軍，賽前主帥雲格亦大讚呢位細細粒嘅雙槍將識得用腦踢波，值得年輕球員學習，如今佢決定留隊能振奮軍心。阿仙奴今季目標除咗足總盃外，亦力爭聯賽亞軍，唔會咁快收韁等放假。

相反，史雲斯要爭取來屆歐霸入場券機會好微，戰意成疑。加上阿仙奴近9仗聯賽贏波中，有8場喺上半場已領先對手，今仗勢必快劏「鵝」，半場主勝有1.6倍咪嫌少。