費倫搏盡絕地大反擊

猪拉多纳

另一場歐霸盃4強次回合，費倫天拿主場迎戰上屆盟主西維爾，西維爾首回合贏3比0，連續兩屆躋身決賽基本上冇懸念，但「紫百合」主帥蒙迪拿強調落後3粒唔代表被宣判「死刑」，希望眾將搏甩髀嚟個絕地反擊，以佢哋前線有穆罕默德沙拿同祖亞昆為馬里奧高美斯造波，今仗絕對有本錢狂攻博一鋪。

不過西維爾一向擅於反擊，「紫百合」空群而出啱晒合尺，唔單止首回合一傳兩射嘅阿歷斯維度同卡路士巴卡勁弗，連後備殺手加美路亦腳風好順，況且佢哋近6場歐霸盃全開大盤，隨時與費倫天拿合演「大」騷，入球大有1.68倍咪嫌少。

（有線61及201台周五凌晨3時05分直播）