拿玻里殺迪 賀賓帥續約

猪拉多纳

歐霸盃4強次回合有睇頭，嚟自烏克蘭嘅迪尼普喺主場迎戰意甲拿玻里，輸波出局唔奇。雖然迪尼普專登留力搏今場，但拿玻里教練賓尼迪斯據講已答應續約1年，有助提升士氣，加上拿玻里首回合壓住對手狂砌，要贏波出線唔難，1.88倍客W博得過。

（有線62、64、202及203、廣東體育周五凌晨3:05直播）
迪尼普殘陣冇運行

首回合踢成1:1，迪尼普有作客入球喺手好似好着數，但唔好忘記，佢哋陣中有唔少球員養傷，前鋒蘇素耶、中場舒希卡夫真高、後衞馬素治同艾基迪奧全部唔踢得，就算佢哋日前喺聯賽主場以0:2不敵索爾亞，收起唔少主將留力，再遇拿玻里都好難有運行。

拿玻里日前作客以2:2打和篤定降班嘅帕爾馬，一樣收起唔少主力做後備，而且大家要留意，首回合拿玻里控球時間有63%，另外17次攻門有7次中目標，相反迪尼普全場得3次埋門，邊隊勁啲好易睇到，加上有消息話，拿玻里教練賓尼迪斯答應續約1年，出年先再考慮執教西班牙國家隊，睇怕佢都希望入決賽賀自己簽新約。

首回合：迪尼普客和1:1
歐霸盃賽制

今輪為4強次回合。若兩回合計打和，計算作客入球優惠，未分勝負則於次回合法定時間後加時30分鐘，加時仍計作客入球優惠，再和即互射12碼決勝。
周四賽制

英乙附：今輪為4強次回合。兩回合計打和，將於次回合法定時間後加時30分鐘，再和即互射12碼決勝。

墨季後：今輪為8強首回合。若兩回合計打和，計算作客入球優惠，未分勝負將由聯賽排名較高一隊晉級。

自由盃：今輪為16強次回合。若兩回合計打和，先計算作客入球優惠，再未分勝負即互射12碼定輸贏。

智甲附：今輪為4強次回合。若兩回合計打和，不計算作客入球優惠，亦不設加時，直接互射12碼分高下。
好波有得睇（直播以電視台公布為準）

英乙附‧修安聯 Vs 史提芬納治：周五凌晨2:45‧TVB302

英乙附‧韋甘比 Vs 普利茅夫：周五凌晨2:45‧TVB301

歐霸盃‧迪尼普 Vs 拿玻里：周五凌晨3:05‧有線62、64、202及203、GT

歐霸盃‧費倫天拿 Vs 西維爾：周五凌晨3:05‧有線61、201