德盃決賽綵排禾堡多仔駁火

猪拉多纳

德甲踢到倒數第二輪，為公平起見九場賽事同時上演，嚟到呢一刻除咗連場護級戰夠晒肉緊外，今晚禾夫斯堡主場對多蒙特亦係寸土必爭之戰，兩軍各有所求今場都志在全取三分，加上雙方都已打入德國盃決賽，今仗預演前哨戰都希望先攞頭彩增添爭盃氣勢，預期係對攻好戲，入球大係穩陣之選。

（有線64及203台周六晚9時30分直播）

禾夫斯堡歐霸盃出局後表現比較反覆，作客輸畀慕遜加柏，主場贏唔到護級嘅漢諾威，搞到原本好穩陣嘅二哥席位都危危乎，球會同教練赫基都一早將目標定喺聯賽亞軍，依家只係領先第三位嘅慕遜加柏兩分，最後兩場聯賽真係不容有失，好在上仗作客贏柏達邦攞番士氣，箭頭巴斯杜斯亦重拾佳態，今仗主場出擊必定搶攻。多蒙特出閘大脫腳但後追勢勁，近五仗三勝兩和，已經追到第七位，只落後死敵史浩克兩分，餘下兩輪聯賽會拚盡全力，爭取可以踢下屆歐霸盃嘅第六位置。
對賽往績長開大盤

兩軍近年交手例必多波入，雙方近八次碰頭全開大盤，禾夫斯堡過去七季主場對多蒙特亦全數開大盤，雙方首循環交鋒，多蒙特主場和咗2比2，今場兩軍和都唔掂，預期又係對攻格局，大盤雖然熱到得1.57倍，都不失為過關穩膽。