ＦＣ東京作客更醒神

猪拉多纳

榜首大戰 一哥紅鑽嫌反覆

日職今日上演榜首大戰，由「一哥」浦和紅鑽喺主場迎戰「二佬」FC東京。FC東京今季作客仲未輸過，可見呢班波客戰韌力十足，今仗面對近期表現有啲反覆嘅紅鑽，相信有力全身而退，阿謙捧FC東京讓球客勝。

（有線61及201台周六下午2時30分直播）

紅鑽嘅根據地本來係浦和市，但浦和市喺2001年同大宮市及與野市3個市合併成為埼玉市，同年更宣布正式廢除浦和市，結果紅鑽就順理成章做咗埼玉市嘅代表球隊。如果由東京去紅鑽位於埼玉市綠區嘅主場埼玉2002體育場，其實只係大約26公里，就好似由佐敦揸車去大埔咁，大約半個鐘左右就到，所以作客嘅FC東京其實唔使花太長時間就可以去到比賽場地，自然免除舟車勞頓之苦。

講完歷史同地理，係時候講番場波。紅鑽目前以10戰24分排喺榜首，領先第2位嘅FC東京1分但少踢1場，對染指首階段聯賽冠軍可以話係揸住主動權。不過，紅鑽近期表現有點反覆，上仗作客中游球隊仙台維加泰竟失咗4球，雖然射手興梠慎三傷愈復出後，已連續2場以後備身份建功，但球隊防線嘅集中力似乎出咗問題，隨時前面入埋唔夠後面輸。
連簽兩猛將振奮軍心

FC東京上仗主場不敵鹿島鹿角，錯失升上榜首機會，但球隊今季作客7戰錄得5勝2和嘅成績非常夠韌力，今仗就算作客都冇有怕。FC東京賽前傳出利好消息，就係繼早前簽入曾代表突尼西亞國家隊上陣嘅前鋒拿斯沙迪，再簽埋有「日本美斯」之稱，曾効力巴塞嘅神童久保健英，雖然兩人今仗未上陣，但對球隊嚟講無疑可振奮士氣，捧讓球客勝。