聖日耳門大勝賀奪冠

猪拉多纳

阿King尋日講完法乙爭升班，今日焦點放喺法甲，一齊見證巴黎聖日耳門捧盃！呢支富豪球隊領先次席里昂6分，剩下兩輪聯賽，換言之，今場作客蒙彼利埃，只需攞1分，就可以完成聯賽3連冠。以聖日耳門嘅霸氣，唔會咁小家求和，甚至會大勝一仗慶功，直取讓球客勝。

（TVB302及now714周日凌晨3時直播）

聖日耳門自歐聯出局後，全力爭奪聯賽，其他對手即食塵，近4仗全勝，共轟入17球，攻力非常驚人。特別係卡雲尼狀態弗爆，已連續5場聯賽入波，上仗更大演帽子戲法。有傳呢位烏拉圭射手想今夏轉會，所以要搏命數胡，希望獲其他大球會招攬，今仗要繼續顯示身價。唔好忘記仲有伊巴謙莫域攻堅，蒙彼利埃難以招架。

蒙彼利埃遇強即屈，今季聯賽主場對摩納哥、聖伊天、里昂等前列球隊，都輸波收場，包括被里昂大炒5比1，喺法足盃亦吞過聖日耳門3蛋，今場淨輸兩球好合理。
串國米勝拉素細

意甲國際米蘭主場對已穩奪聯賽冠軍嘅祖雲達斯，祖記剛經過激戰，打入歐聯決賽，消耗大量體力，下周中仲要出戰意大利盃決賽對拉素，今場好可能派副選出擊，國米主W可取。（TVB301周日凌晨零時直播）另一場，拉素亦可能留力踢意盃，作客對季尾走下坡嘅森多利亞，寧願揀入球細。

（TVB301周日凌晨2時45分直播）