史特加漢堡搶分護級大晒冷

猪拉多纳

季尾波最講鬥志！護級隊伍一去到季尾就最搏命，今晚包尾大幡嘅史特加主場恭候漢堡就精彩咯，史特加非勝不可；漢堡亦未安全上岸，兩軍肯定騷盡哥利攻到癲，一於博1.68倍入球大，大家買定花生等睇入球騷啦！

（有線61、201周六晚9:30直播）

曾經風光一時嘅史特加同漢堡，近年愈踢愈沉，呢兩季更加要為護級而煩惱。史特加依家以30分喺聯賽包緊艇，德甲就只係剩番兩輪，假如呢場有咩冬瓜豆腐，而弗賴堡、柏達邦同漢諾威幾隊高佢1分嘅榜末球隊都贏波嘅話，佢哋隨時會篤定降班，喺唔可以輸嘅情況下，唔攻點掂先？
史特加鐵三角火力猛

史特加戰績曳確係爭唔落，好在前線主力夏歷、丹尼爾真錫克近期腳風順，加埋上場鬥緬恩斯射入世界波嘅迪達維，呢個攻擊鐵三角有番咁上下威力，夠晒本錢撕破漢堡防線。
漢堡崇尚踢進攻足球

另邊廂排尾5嘅漢堡，只係領先史特加2分，而且呢間球會炒人唔留手，拉巴迪亞已經係今季第4件教頭，佢老人家當然希望幫球隊逃出生天兼省招牌啦。自從佢接掌之後，漢堡近4戰錄得2勝1和1負，表現明顯Sharp醒晒，最重要係拉巴迪亞套戰術好肯攻，咁樣實唔會悶親班「花生友」，試問入波又點會少吖！
頂占筍盤：史特加（入球大）