射手興梠慎三搏殺 浦和夫添反轉東京

猪拉多纳

日職今日有場榜首大戰，由「一哥」浦和紅鑽主場對「二哥」FC東京，計實力可以話半斤八両，但係東京件王牌前鋒武藤嘉紀有傷，相反浦和有老牌鋒將興梠慎三（傷愈披甲，一減一加，都係博浦和小勝開1.7倍主W穩陣啲。

（有線61、201周六下午2:30直播）
主場17戰東京贏11場

浦和今季開局走勢好靚，撇除日超盃、亞冠盃唔計，佢哋响日職11戰不敗，主場仲5戰全勝，已經刷新咗04年嘅10戰「無敗紀錄」，而且佢哋主場對東京嘅勝率好高，史上17戰取得11勝3和3負，有成65個巴仙開到主W，所以數據上睇好佢哋係正常嘅。
客軍武藤嘉紀膝傷

當然，數據係死嘅，東京今時唔同往日，最近呢期嘅日本國家隊集訓名單，佢哋有5件兵入選，變咗藍武士兵源大戶，尤其嗰件武藤嘉紀，公認係日本男足當今最Hit前鋒。但係好不幸，武藤星期二响國家隊集訓嗰陣又撞親，右膝舊患復發，入完醫院檢查之後連抖咗兩日，今場出唔出得都未知。如果冇咗佢，另一件鋒將平山相太又啱啱至好番，只可以坐後備席，咁樣對東京嘅攻擊力構成好大影響。

浦和就唔同嘞，中場柏木陽介啲傷唔算嚴重，興梠慎三隻左腳都有些少唔妥，佢個前鋒拍檔隆比真歷亦因為對仙台場波撞爆鼻骨，今日要戴面罩落場，不過冇一個係傷到唔踢得嗰隻。可以夫添出擊嘅浦和，家陣少踢1場只係領前東京1分，假如今日贏到，就可以甩開對手，攞到首階段冠軍嘅機會大增，咁又點會唔去盡呢？博浦和主W啦。